4
መቃ ሚሸን ደእያ ቡቁራ
1 ህዛ፥ ፆሳይ ባ ማሮተꬃን ሀ ኦሱዋ ኑስ እምዳ ግሾ፥ ኑኒ ኡፋይስ ቃንፆኮ።
2 ኑኒ ዬላያ ጌማ ኦሶ ኡባ አግዳ፤ ገነ ኦሶ ኦꬆኮ፤ ፆሳ ቃላ ዎርዶራ ዋላኮኮ። ቱማ ቆንጨን ሃሳይሸ፥ አሳ ኡባ ካሀይ ኑና ኤካና መላ ፆሳ ስንꬃን ኑና ሺሾስ።
3 ኑ ኦድያ ዎንገላይ ጌምዳባ ግድኮካ፥ ጌምዳይ ꬋዮ ኦገን ደእያ አሳሳ።
4 ሀ አላምያ ሃርያ ፆሳይ አማኖና አሳ ዎዛና ጎዝስ። ኤንቲ ፆሳ መላ ግድዳ ክርስቶሳ ቦንቾ ዎንገላ ፖኡዋ በኦና መላ ድግስ።
5 ኑኒ፥ የሱስ ክርስቶሲ ጎዳ ግደይሳነ ኑ እያ ግሾ ህንተ ኦሳንቾ ግደይሳ ኦዶስፐ አትሽን፥ ኑባ ኦዶኮ።
6 “ꬉማን ፖኦይ ፖኦ” ግዳ ፆሳይ፥ ክርስቶሳ ሶምኡዋን ፖእያ ፆሳ ቦንቹዋ ኤራ ፖኡዋ እማናዉ ባ ፖኡዋ ኑ ዎዛናን ፖእስስ።
7 ሽን ኡባፈ አꬍያ ዎልቃይ ኑባ ግዶናሽን፥ ፆሳባ ግደይሳ በሳናዉ ሀ ቦንቾ ሻሎይ መቃ ሚሸ ግድዳ ኑ አሳተꬃን ደኤስ።
8 ኑ ኡባ ባጋራካ ዋየትዳ፥ ሽን መቀረትቦኮ። ኑስ ሀድርስ ግድስ፥ ሽን ኡፋይስ ቃንፅቦኮ።
9 ኑ፥ ሞርከታን ጎደትዳ፥ ሽን ላገ ꬋይቦኮ። ኑ ሞርከታን ሾጨትድ ኩንድዳ፥ ሽን ꬋይቦኮ።
10 የሱሳ ደኦይ ኑ አሳተꬃን ቆንጫና መላ እያ ሀይቁዋ ኡባ ዎደ ኑ አሳተꬃን ቶክድ ዩዮስ።
11 የሱሳ ደኦይ ሀይቅያ ኑ አሳተꬃን ቆንጫና መላ ፓፃ ደእያ ኑኒ እያ ግሾ፥ ኡባ ዎደ ሀይቆስ አꬍድ እመቶስ።
12 ህዛ፥ ሀይቆይ ኑናን ኦꬅያ ዎደ ደኦይ ህንተናን ኦꬄስ።
13 ጌሻ ማፃፋን፥ “ታ አማናስ፤ ሄሳ ግሾ ኦዳስ” ያገትስ። ሄሳ መላ አማኖይ ኑስ ደእያ ግሾ ሃሳዮስ።
14 ጎዳ የሱሳ ሀይቆፐ ደንꬅዳ ፆሳይ፥ ኑናካ የሱሳራ ሀይቆፐ ደንꬃናይሳነ ህንተራ እስፈ ባ ስን ሺሻናይሳ ኤሮስ።
15 ሄስ ኡባይ ሀንዳይ ህንተ ግሾሳ። ፆሳ አꬎ ኬሀተꬃይ ዳሮ አሳ ጋክያ ዎደ አሳይ ፆሳ ቦንቹዋስ ዳሮ ጋላታ እማና።
16 ሄሳ ግሾ፥ ኑኒ ኡፋይስ ቃንፆኮ። ኑ በንትያ አሳተꬃይ ዳቡርሸ ብያባ ግድኮካ፥ ኑ አያና አሳተꬃይ ጋላስ ጋላስ ኦራፄስ።
17 ሀእስ ኑኒ ዋየትያ ሀ ካዉሻ ዋየይ፥ ኡባፈ ኬህ ግታትያ መርና ቦንቹዋ ኑስ እምሳና።
18 ኑኒ በንትያባ ግዶናሽን፥ በንቶናባ ፄሎስ። በንትያባይ ሀእሳ፥ ሽን በንቶናባይ መርናሳ።