4
1 ጎዳቶ፥ ህንተዉካ ቃስ ሳሎን ጎዳይ ደኤይሳ ኤርድ፥ ህንተ አይለታስ ፅሎተꬃንነ እሱዋ እሱዋፈ ሻኮና ኮሽያባ ኦꬅተ።
2 ፆሳ ባርክድ ጋላትሸ ቃንፆና ዎስተ።
3 ፆሳይ ባ ቃላስ ፐንገ ዶያና መላነ ታኒ ሄሳ ጋሶን ቃሾን ደእያ ክርስቶሳ ፁራ አዋጃና መላ ኑስካ ዎስተ።
4 ቃስ ታካ በሰይሳዳ ቃላ ቆንጭሳዳ ኦዳና መላ ታዉ ፆሳ ዎስተ።
5 እንጀትያ ዎደ ኡባ ጎኤትሸ አማኖና አሳ ማታን ጭንጫተꬃን ደእተ።
6 ህንተ አሳ ኡባስ ኮሽያ ዛሮ እሞ ኤራና መላ ህንተ ኦዳይ ኡባ ዎደ አꬎ ኬሀተꬃን ኩምዳይሳነ ማፅነዳ ማልእያባ ግዳናዉ በሴስ።
ሳሮꬆ
7 ኑ ሲቆ እሻይ ትክቆስ፥ ታራ እስፈ ጎዳ ኦሱዋን አይለ ግድዳ፥ አማነትያ ኦሳንቾይ፥ ታ ደኡዋባ ህንተዉ ኦዳና።
8 ታኒ እያ ህንተኮ ኪትዳይ፥ ኑ ዋንድ ደእያኮ ህንተዉ ኦድድ ህንተና ምንꬃና መላሳ።
9 አናስሞስ፥ አማነትያ ሲቆ እሻይ፥ ህንተ ባጋይ፥ እያራ ህንተኮ ቤስ። ኤንቲ ሀይሳን ሀንያባ ኡባ ህንተዉ ኦዳና።
10 ታራ ቃሸትዳ አርስፅሮኮስነ ባርናባሳ እሻ ናአይ ማርቆስ፥ ህንተና ሳሮ ያጎሶና። ታ ህንተዉ ካሰ ኦድዳይሳዳ ማርቆስ ህንተኮ ቢኮ እያ ሞክተ።
11 የሱሳ ጌተትያ ያስፆስ ህንተና ሳሮ ሳሮ ያጌስ። ፆሳ ካዎተꬃ ግሾ ታራ ኦꬅያ አሳታ ግዶፈ አይሁደ ግድዳይሳት ሀ ሄꬓታ፤ ኤንቲ ታና ዳሮ ምንꬅዶሶና።
12 ህንተ ባጋይ፥ ክርስቶስ የሱሳ አይለይ፥ ኤጳፍር ህንተና ሳሮ ሳሮ ያጌስ። እ ህንተ ፆሳ ስንꬃን ምንድ ኤቃናዳነ ፆሳ ሸንያ ኤርድ ፖላና መላ ኡባ ዎደ ፆሳ ህንተ ግሾ ዎሴስ።
13 እ ህንተ ግሾነ ሎዶቀንነ ህራፖልሳ ካታማን ደእያ አሳ ግሾ ዳሮ ዳቡርዳይሳ ታ ማርካታይስ።
14 ኑ ሲቆ እሻይ ዶቶረይ ሉቃስነ ዴማስ፥ ህንተና ሳሮ ሳሮ ያጎሶና።
15 ሎዶቀን ደእያ ኑ እሻታስ፥ ንምፋስነ እ ኬꬃን ሺቅያ አሳስ ኑ ሳሮꬁዋ ኦድተ።
16 ሀ ዳብዳብያ ህንተ ናባብዳፐ ጉየ፥ ሎዶቀ ዎሳ ኬꬃን ናባብስተ። ህንተካ ሎዶቀ ዎሳ ኬꬃይ ህንተዉ የድያ ዳብዳብያ ናባብተ።
17 ቃስ አርክጳሳ፥ “ጎዳይ ነዉ እምዳ ኦሱዋ ፖላናይሳ ዶጎፓ” ያግድ ቆፍስተ።
18 ታኒ፥ ጳዉሎስ፥ ሀ ሳሮꬁዋ ታ ኩሸን ፃፋስ። ታ ቃሹዋ ቆፕተ።
ፆሳ አꬎ ኬሀተꬃይ ህንተራ ግዶ።