21
1 ሄሳፈ ጉየ፥ እዮሳፈፅ ሀይቅድ ባ ማይዛታራ ጋሄትስ። ዳዊታ ካታማን ባ ማይዛታ ዱፎን ሞገትስ። እያ በሳን እያ ናአይ እዮራም ካዎትስ።
ይሁዳ ካዋ እዮራማ
(2 ካዎ 8:17-24)
2 እዮራማ እሻት አዛርያሳ፥ ይኤላ፥ ዛካርያሳ፥ አ ዛርያሳ፥ ምካኤላነ ሳፋፃ፤ ሀይሳቲ ይሁዳ ካዋ እዮሳፈፃ ናይታ።
3 ኤንታ አዋይ እዮሳፈፅ ኤንታዉ ዳሮ ብራ፥ ዎርቃ፥ አልኦ ሚሸነ ግምበትዳ ካታማታ እሚስ። ሽን እዮራም እያዉ ባይራ ናአ ግድያ ግሾ ካዎተꬃ እያዉ እሚስ።
4 እዮራም ባ አዋ ካዎተꬃ ኤክድ ምንዳ ዎደ ባ እሻታ ኡባነ እስ እስ እስራኤለ ሀላቃታ ማሻን ዎꬍስ።
5 እዮራም ካዎትያ ዎደ እያዉ ላይꬅ ሀስታማነ ናምአ፤ የሩሳላመን ሆስፑን ላይꬅ ካዎትስ።
6 እዮራም አካባ ናእዉ ኤክዳ ግሾ አካባ ሶ አሳይ ሄመትዳይሳዳ ካሰ እስራኤለ ካዎታ ኦግያን ሄመትስ፤ ጎዳ ስንꬃን ኢታባ ኦꬅስ።
7 ግዶሽን፥ ጎዳይ ካሰ ዳዊታራ ጫቅዳ ጫቁዋ ግሾ ዳዊታ ኮቻ ꬋይሳናዉ ኮይቤና። ዳዊታ ኮቻይ መርናዉ ካዎታና መላ ጎዳይ እያዉ ጫቅስ።
8 እዮራማ ካዎተꬃ ላይꬃን፥ ኤዶመ አሳይ ይሁዳ ካዋ ቦላ ማካልድ ባንታዉ ካዎ ካዎꬅዶሶና።
9 ሄሳ ግሾ፥ እዮራም ቶራ ሞጮናታነ ፓራ ጋረታ ኤክድ ኤዶመ ኦላናዉ ብስ። ኤዶመ አሳይ እያነ እያ ፓራ ጋረታ ሀላቃታ ኦልዶሶና። ሽን እዮራምነ እያ አሳይ ቃማ ደንድድ ባቃትዶሶና።
10 ሄ ዎደፐ ዶምድ ሀች ጋካናዉ ኤዶመ አሳይ ይሁዳ አሳስ ሃረትቦኮና። እዮራም ጎዳ፥ ባ አዋታ ፆሳ አግዳ ግሾ ልብና አሳይ ሄ ዎደ ይሁዳ ካዋ ቦላ ማካልዶሶና።
11 እዮራም ይሁዳ ገዘ ቢታን ꬎቃ ጎይኖ በሳታ ጊግስስ፤ የሩሳላመን አሳ ላይማታና መላ ኦꬅስ፤ ይሁዳ አሳካ ባለꬅስ።
12 ናበይ ኤልያስ እዮራማስ ዳብዳበ ሀይሳዳ ያግድ ፃፍስ፤ “ጎዳይ፥ ነ አዋ ዳዊታ ፆሳይ፥ ‘ኔኒ ነ አዋ እዮሳፈፃ ዎይኮ ይሁዳ ካዋ አሳ ኦግያን ሄመታናይሳ አጋዳ፥
13 እስራኤለ ካዎታ ኦግያን ሄመታዳሳ። አካባ ሶ አሳይ ኦꬅዳይሳዳ ይሁዳንነ የሩሳላመን ደእያ አሳይ ኤቃ ጎይናና መላ ኦꬃዳሳ። ቃስ ኔፐ ሎእያ፥ ነ አዋ ሶ አሳ፥ ነ እሻታ ዎꬋዳሳ።
14 ሄሳ ግሾ፥ ጎዳይ ነ አሳ፥ ነ ናይታ፥ ነ ማቸታነ ነዉ ደእያ ኡባ ዎልቃማ ጋዶን ሾጫና።
15 ነና ማራጨ ሀርገይ ኦይክን፥ ማራጨይ ካረ ከያና ጋካናዉ ነ ኢታ ሳከታና።’ ”
16 ጎዳይ ፍልስፄመታነ ቶጰ ማታን ደእያ አራበታ እዮራማ ኦላና መላ ደንꬅስ።
17 ኤንቲ ይሁዳ ቦላ ደንድድ ካዎ ጋꬎን ደእያ ሚሸ ኡባ፥ ካዋ አደ ናይታነ እያ ማቸታ ድእዶሶና። ቃስ፥ እያ ናይታ ኡባፈ ካሎ ግድዳ አካዝያሳፐ አትሽን፥ ሀራ እስ ናእካ አትቤና።
18 ሄሳፈ ጉየ፥ ጎዳይ ፓፃናዉ ዳንዳኦና ማራጨ ሀርገን እዮራማ ሾጭስ።
19 ናምኡ ላይꬃ ግዶን ሀርገይ እያ ቦላ ጎብስ፤ እያ ማራጨይ ካረ ከይስ፤ እ ኢታ ሳከትድ ሀይቅስ። እያ ሞግያ ዎደ አሳይ ካሰ ማይዛታስ ኦꬅዳይሳዳ እያ ቦንቾስ ምꬅ ዶርድ ታማ ኤꬅቦኮና።
20 እዮራም ካዎትያ ዎደ እያዉ ላይꬅ ሀስታማነ ናምአ፤ እ የሩሳላመን ሆስፑን ላይꬅ ካዎትስ። እ ሀይቅያ ዎደ ኦንካ አዛንቤና። እዮራም ዳዊታ ካታማን ሞገትስፐ አትሽን፥ ካዎታ ዱፎን ሞገትቤና።