52
Yaubada bikoli Yerusalem
1 Mina Yerusalem, kupapeulasi e kukwaigalaisi mi valu!
Ibodi Yaubada la valu viloubumaboma bukukwatububulaisi kala gigisa bibwaina.
Matausina gala inikolaisi Yaubada gala wala avai tuta bisuvisi okalapisilela mi valu tuvaila.
2 Mina Yerusalem, ibodi bukukosovalisi!
Kutokaiasi metoya opwaipwaia e kusilaisi omi takaikaia!
Tomotala Saiyoni yokomi eikatupipaimi,
kutalikwaisi miyasina tanumnumta eiyuwolaimi.
3 Guyau iluki la tomota kawala, “Avai tuta yokomi eivigakaimi ula, gala wala igimlokaimi wa mani oluviga bilauwaimi. E makawala goli yeigu gala wala avaka bamapu matausina paila batanekwaimi.
4 Omitibogwa lokulosi Itipita e kusisuaisi makawala mina gilagala, e baisa yokomi wala titoulemi mi tagwala lokulosi. Mitaga mina Asiria imaisi deli si peula iyosaimi e ilauwaimi e gala wala avaka igimlokaimi oluviga bilauwaimi.
5 E baisa tuta e vavagi makwaina makala wala eikaloubusi baisa yokomi mapilana Babilonia. Yokomi eikatupipaimi e ilauwaimi e gala wala avaka igimlokaimi. E matausina availa eiguyoiyaimi ikamnomwanasi deli ninasi walakaiwa e tuta komwaidona ikaluwouwaigusi wala.
6 Mitaga ka, igau tuta bima yokomi bukusimokwitasi yeigu wala Yaubada deli avaka bogwa lalukibogwaimi.”
7 O ina bwaina kidamwa bitagisi
taitala touwata eimaima olilina koya,
matauna eimmai bulogala bwaina, bulogala paila vakota!
Matauna bikamituli kalisewa deli biluki mina Saiyoni,
kawala, “Mi Yaubada matauwena Guyau!”
8 Matausina eiyuuyausasi valu eigougovasi.
Ka, komwaidosi eigougovasi deli si mwasawa!
Matausina bogwa eigisaki mitasi
paila Guyau bogwa eikaimilavau leima Saiyoni.
9 Yokomi lokusivagasisi Yerusalem avai tuta eikodidaimisi,
kugovasi deli mi mwasawa!
Paila Guyau bogwa bikoli la valu,
deli bivisimoli la tomota.
10 Guyau bikatumovi la tomota metoya ola peula kwebumaboma,
e mina watanawa komwaidona bigisaisi goli.
11 Yokomi kala tokeula guguwala Bwala Kwebumaboma,
ibodi bukusilavaisi Babiloni.
Kukwabomaimi bibwaina avai tuta bukusilavaisi,
e gala avai vavagi kaboyogwala bukukwabikonaisi.
12 E baisa tuta gala biyowa lupomi mwada bukukwalubaigogunasi avai tuta bukusilavaisi mapilana,
kaina bukusakaulasi metoya kami tilaula.
Paila Guyau matauna bivakadaimi,
e da Yaubadasi mina Isireli matauna bivakwabwaimi.
Yaubada la touwata iboda kala mmayuyu
13 E Guyau eilivala kawala,
“Ka, ulo touwata bogwa wala bipeula ola wotetila,
e matauna kala taimamila saina walakaiwa sainela.
14 Bidubadu tomota saina itutu uwosi avai tuta leigisaisi matauna,
e matauna wowola nebanebawokuva wala,
e gala ibodi bitavitusi mwada matauna tomotatoula.
15 Mitaga tuta baisa avai boda avai boda bitulaulasi baisa matauna,
e gweguya bogwa wala bitutuvakau ninasi e gala wala kabolivala.
Matausina bogwa bigisaisi e bikatetasi,
vavagi makwaisina gala avai tuta inikolaisi.”