105
Yaubada deli la tomota
(1 Lil 16.8-22)
1 Bitanokagutokisi baisa Guyau
e bitakamitulaisi matauna Tovakaigaga.
Bitalukwaisi boda ituwoli ituwoli avaka avaka eivagi.
2 Bitawosisi kala yakaula Guyau.
Bitalivalaisi makwaisina vavagi kabokatubau avaka avaka eivagi.
3 Bitamwasawasi paila eivigakaidasi la vavagi goli.
Ibodi komwaidosi availa availa itapwarorusi baisa matauna bimwasawasi.
4 Bitalokaiasi Guyau paila pilasi
e tuta komwaidona bitatapwarorusi baisa matauna.
5-6 E yokomi tubula Eberaam, matauna la touwata,
e yokomi tubula Yekobe, matauwena einagi,
bukululuwaisi makwaisina kabutuvatusi eivagi Yaubada,
deli bukululuwaisi la yakala makwaisina.
7 Guyau matauna da Yaubadasi.
Matauna la karaiwaga duwosisia isisu paila komwaidosi mina watanawa.
8 Matauna bivagi makawala la kabutu, tuta gala wala biwokuva,
e makawala la biga katotila bila, bila, biboda tubwa lakatuluwotala goli.
9 Matauna bivagi makawala eilivala baisa Eberaam,
e makawala la biga katotila baisa Aisake.
10 Guyau eikabutu deli Yekobe,
e baisa goli bikanigaga.
11 Kawala, “Bogwa basakaim makubilana Kenani,
e bukuvigaki m vavagi tatoum.”
12 Omitibogwa Yaubada la tomota gala ibawasi,
e isisuaisi tomitawasi wala mapilana Kenani.
13 Iwowausi wala avai valu avai valu,
e deli avai kabokwaraiwaga avai kabokwaraiwaga.
14 Mitaga Yaubada gala itagwala availa bilamidadi matausina.
Magila bikoli matausina, e mapaila ikamitilaki gweguya,
15 kawala, “Taga kuyogagaisi matausina ulo towotetila bogwa lanagi.
Taga kukwabikonaisi matausina ulo tovitoubobuta.”
16 Guyau iwitali molusaula osi valu
e ikaimali komwaidona kʹasi.
17 Mitaga eiwitali taitala ilobogwa omitasi,
matauwena Yosepa, eigimolaisi paila ula.
18 Kaikela kala katupipi tanumnumta,
e kaiyola kala katupipi tanumnumta,
19 e isisu makawala, tatoula wala ikaloubusi makawala eivitoubobuta omitibogwa.
Guyau la biga ikamokwiti matauna.
20 E oluvi guyoula Itipita itaneku Yosepa,
e matauna si guyau boda ituwoli ituwoli ikau iligaiwa kala katupipi.
21 E ivigaki matauna kasi tokugwa kaidadala la valu,
deli biguyoi viloumwaidona Itipita.
22 Iguguyoi komwaidosi guyau matauna la tosikwawa,
e isim la karaiwaga bivituloki matausina kala tovakeda guyau.
23 E oluvi Yekobe ilokaia mapilana Itipita
e imili valu baisa.
24 Guyau ivigaki la tomota idalasi,
e ikatupewoli matausina odubasi kasi tilaula.
25 Ivigaki mina Itipita bipakaisi la tomota,
deli bilamidadaisi matausina.
26 E oluvi iwitali la touwata Mosese,
e deli goli Eroni, matauwena einagi.
27 Matausina eivagaisi Yaubada la vavagi topilaveka,
e ivagaisi kabutuvatusi mapilana Itipita.
28 Yaubada eiwitali dubilikitakita ovalu,
mitaga mina Itipita gala bikabikuwolaisi la karaiwaga.
29 Ivigaki si waya bidavilasi imila buyavi.
e ikatumati si yena komwaidona.
30 Si valu ikaligiaki kumeu,
e ligisa goli tuvaila eikasewoki minasina.
31 Yaubada ikaraiwaga e nigunagu deli segusegu
saina bidugaga ikasewoki valu.
32 Kaimapula kunatoula iwitali kuna kwekulokula e deli kavikavila ovalu.
33 Ikodidaimi bigulesi waini deli makaisina seuseu,
e deli ikouwoli kai komwaidona.
34 Ikaraiwaga, e nipawa iviloubusisi,
gala gagabila availa bikalau kasi bawa.
35 Ikomasi kaila valu komwaidona,
e bagula ikamkulovaisi wala.
36 Ikatumati si kuluta tauwau
komwaidona mina Itipita.
37 E oluvi ivakadi mina Isireli isunapulasi.
Ikokeulasi siliba deli goula
e komwaidosi deli si momova e deli si peula.
38 Mina Itipita ikukolaisi matausina,
e imwasawasi avai tuta isilavaisi si valu.
39 Yaubada isaili lowalowa odubasi la tomota
e wa bogi isaiki kova paila bititapi matausina.
40 Inigadasi e iwitali kasi gwaba gogoila.
Isaiki kaula metoya wa labuma e ikamsi ikomatasi goli.
41 Iulaim dukutotu e sopi igiposisi,
e sopi ititayelu oviloupakala makawala waya.
42 Iluluwai la biga katotila kwebumaboma
baisa la touwata Eberaam.
43 E mapaila ivakadi la tomota isunapulasi,
e iwosisi igovasi deli mwasawa.
44 Isaiki matausina si pwaipwaia tuwoli tomota,
e deli tuvaila itagwala biyoulisi si kwabila tomota matausina.
45 E ivagi makawala kidamwa la tomota bikabikuwolaisi la karaiwaga kwevakaveka,
deli bivagaisi makawala komwaidona la karaiwaga kwekikekita.
Kala yakaula Guyau!