29
Kaigala Guyau outuyagila
1 Kuyakawolaisi Guyau yokomi mina labuma.
Kuyakawolaisi la guyugwayu deli la peuligaga.
2 Kuyakawolaisi Guyau toguyugwayu sainela,
kukululusi omatala matauna Tobumaboma avai tuta biviloubusi.
3 Ka, kaigala Guyau talilagi odabala milaveta.
Yaubada toguyugwayu ibutupilapala
e kaigala saina kaigaveka obolita.
4 Kaigala Guyau talagaisi saina peula.
Kaigala Guyau butula itutuvakau nona.
5 Kaigala Guyau bikouwoli kweisila.
Kaina goli kweisilela mapilana Lebanoni,
mitaga bikouwoli wala.
6 Ivigaki koyala mapilana Lebanoni
biyuweitaulasi makawala bulumakau nagugwadi,
e ivigaki makwaina Koya Emoni
bipela makawala bulumakau namwala natubovau.
7 Kaigala Guyau ivigaki kavikavila bikavila.
8 Kaigala ivigaki viloupakala biyega
e iiyagi mapilana viloupakalela Kadesi.
9 Guyau kaigala iiyiku yawa,
e ikatudebali yekwesisi makaisina kai.
E komwaidosiga ola Bwala Kwebumaboma
idoudousi kawasi, “Yaubada Toguyugwayu.”
10 Guyau ikaraiwogi komwaidona tilibwabwau.
Matauna Guyau la karaiwaga gala wala biwokuva.
11 Guyau ikatupewoli la tomota,
e ikatiligavi luposi matausina.